Tula para kay VJ

Nakaupo tayo noon sa lumang upuan

Sa tanggapan ng pahayagan

na ating pinaglingkuran

Lagi at lagi na lang

napipili kitang daraingan

ng mga bumabagabag

sa aking isipan

problema sa pinansya,

pamilya, sa eskwela

lagi at lagi ring

ikaw ay nakikinig

nagpapayo, sumisimpatya

sabi mo, tulad ng iyong pamilya

darating ang isang araw

kami rin ay liligaya

hindi ko halos mabilang

kung ilang beses,

at kung anu-anong paraan

ang ginawa mo upang

ako ay tulungan

nariyang inihalili mo ako

sa iniwang trabaho

bilhan ng tinda ko

at para sa bitamina ng lola ko

o gamot ng nanay ko

pambili inaabot mo

Higit sa lahat

sa iyong payo ako ay namulat

Pag-asa ang hatid

sa tulad kong pighati'y walang patid

Sayang, kaibigan

dahil kung meron man akong pag-aalayan

ng kung anumang meron ako ngayon

siguradong kasama ka roon

sa iyong kinaroroonan

kung saan ay walang karahasan

dungawin mo ang aking laban

dito sa buhay na walang katiyakan

Setyembre 14, 2010. 4:42PM